متبورة القدم جاتنا ام جسيما" ضاوى
وقلت طلقت فينا نيران جهنم وبـلاوى
اكان ماخوفة الفضيحه وقوالت الراوى
ينتــم المراد ويتبسط المتيم وهاوى
******
يانفسى الصبر امسكى حبالو وشدى
موزونة القوام لاتخــتف صـوابك اهجدى
آه من فراق بريبة الاراك ام خديدا" يندى
حكر كاس الجمال مالكاهو عندها فردى
******
شلتا الليل سقد لامن بياحو يلوح
سامرتا النجوم ابكى واقـول وابـوح
حالى الـعلى يـشابــه طلـوع الـروح
عافيلك سهادى وكتر العذاب والنوح
******
شـــوف العين برا ما ســــمعنابو قاطع الفرقه
وما بهــــز الجبال ضـــرب السيوف والدرقه
بس صدرا" طامح خـــــلاني زي الـــورقه
طفش عقلى رايـــح شمــــار في مرقه
******
الطـين السـمح دايـما بخضّر زرعو
والأصـل الجميـل لابدّ يتبـــعو فــرعو
وكت تحر الزول يحجاهو سيفو ودرعو
زي أمك وابوك ما بتلقي ناساً يرعو
******الحنك المفلس آخـرة جـزاهـو طناش
موزونة القوام كل من شافا تبه وهاش
مجنون غرامها ضــارب الفيافى وطاش
كيفن تنولو رضاها ان ما اتوزنت قـراش
******
سمح الاصل لابد فرعو جميل
وست البيت دائما" وليها ليها دليــل
تنصلح ان صلح وسار مشيهو عديل
وان فسد حصادو الخيبه والتنــكيـل