الدوكــــــــــــــه

ارسل له باشري فريعابي قصيده يشكر دوكته التي هي ملكه وابراهيم دوكتو عهدة فقال باشري:-

دوكتي انا مو دواك دراسه
ماها مطفقه وعاكاسة
من كبري البطانه اساسه
مويته حلوه غير كنداسه
موفنطاز جبيت واماسه
القاعد اوكير حراسه
وقمحك من الخواجة اغاثه
الشرموط كلد او كاسه
مو شرموط بقيره خاسه
فرد عليه ابراهيم دقاق
ياباشري ليك مني الشوق ودارك تبقي مبروكه
سلام وفير وكتير للدايرين يخاووكا
والمابيك كضب جابلو تنفوكه
وصلتني رساله مسروكه
تهاظرني وتضاحكني ونسه واخر اضحوكه
وفيها هجوم عنيف وظريف ماهو علي علي الدوكه
وحسع تتحجز علي دوكتك بس علا ممسوكه
قالت وروه انسابي خلو ورقتو اليلوكه
دوكتي انا صاجه من حلوان باعتماد البنوكه
وعهده اصلي مي هيلي ملك للشعب مشروكه
الطول اربعه قدم والعرض قدمين شوكه
ومن اثر قلبه الصبه حتي الارض مدكوكه
واوكير لمن يكون جمبي ينط يارب هباهوكه
وبزديقته اسطبه خمسه الوان فيها مشروكه
دوكتي الديمه مدعوكه
لون الصلعه عن ريقن وقورباتشوف ورمبوكه
كوز الصلصه دكتوره وهو البيحسن سلوكه
كاتب لي روشته شرطا تبقي مدعوكه
جمبها حله فوق النار فيها ملاح والا حمامه مسبوكه
دوكتي في بيته محتشمه ماها جم صوره صعلوكه
وقمحك برضو زي قمحي ماك غازلك فيهو سلوكه
وزي ماالخواجه اداني انتك برضو ادوكه
ناس اوكير وناس ادروب ياريت لو يخاووكه
قومت ادروب من الحله تصحي الحله بديوكه
وياحلات البادية وكت يترنم عنبلوكه
شن عندك بلا امحمد فوق حمارتو الهجوكه
خرمان ويحك في الحقه بي شوكه