المقسومه مابتنفات

المقسومــه مابتنفـــات والحى بياخد رزقو
همــــوم الدنيــــا فـــــارمــه الفؤاد وتحــزقو
جرعنى المــــرار ســم العـــزيز بــــى زرقــو
طشيت بلا هـــداى حشاى نــــازف مـــزقو


المقسومه مابتنفات وربط العوج محلول
قلب السجم اهاتو ماليات العرض والطول
الزول الزمان جامع سمح محاسن القـول
يبس قواقى لهاى دهدهنى صِر مخــبول

المقسومه مابتنفات وال من الله واصله
احترتا فى امرى وكل الدواهى الحاصله
زولا بــدرى على يهمو يعرف الحــــاصله
جازيتو زدتا الامو وسقيتو الهموم الواصله


المقسومه مابتنفات والقدر يعمى البصر
زولا علــى رؤوف يهدينـــى وعلى يصر
كم قاسمنى مر الامى شايل عليهو نزُر
جازيتــــو مر الوجعه وضيق الليالى المرُ

المقسومه مابتنفات والعرجا ترجع ساما
هماً على مطبوق واوجاعى زايده الامـا
بس وحات ربى فــارض الحـــلال وحــراما
ات عندى فوق للناس عزه وحنين وعلامه

المقسومه مابتنفات ومرحب حباب اقدارى
ومن اللــه ال تجــى ترانى قـــلتا اعـــزارى
لكنى مابرضــى اهيــن كــرامــة افكــــارى
ادوس معانى نبيله ربيــت معـاى فى دارى



المقسومه مابتتفات وصايب النصيب لاشك
والمن الله واصله ومربوطتو مابتتــفــك
ياحظ السجم لامتين تسك فــى اللك
ومتيــن ياكـــريم تـــردي السواجير دك

المقسومه مابتتفات وديمه الصابرات روابح
المن الله واصـــله والمكتوبه امرا" واضـــح
ياسابل الستر متين بى لمـاهاو اشــارح
يرجع الزمن تحنان زى ماكان ودادو البارح


المقسومه مابتتفات والمكتوبه اكيده وصايبه
ياحظ الرماد لامتين شموسك غايبه
بدلتا افراحى الزمان كسيت بشاشتو النائبه
زى موية الرهاب ما بتتنطال وحالتك عايبه

المقسومه مابتتفات والنـــيـه زاملة سيدا
متين يقيف النوح وتبرأ جروح ويصفا صديدا
احكام الـــزمــــان جــــاب القـــدر تـــرديــدا
ورثنى السهاد والهم احــلامى كتب تأبيدا


المقسومه مابتتفات وامر المولى نافذ وصاير
سبحانو من نعمو اكـــرم عطـــاهو بصاير
حملنا الامانه عقول وعيون وروح وسراير
شقيك يادنيا جاهل الـشينه كاسا" داير

المقسومه مابتتفات ودرب العوج متروك
الزول بكرمو اصلو ويحلو فى المـــشبوك
عدم الطبع والزوق من رباية امـــك وابوك
والمابيهديهو المولى غير شك امرو دروك


المقسومه مابتتفات وبتفك المرخرخ ونى
طاوعتا القلب اوردنى هــــوة مهـــاك الصى
ورثنى نوح وسهاد فوق جرحى خالف الكى
من لجة مرارو رويت املئ واكـــــيل ب ايدي



المقسومه مابتتفات والمكتوبه تلعب دورا
فارقتا المضمر هافو عافيت جنايــنو وسورا
طشيت ضربتا هويد بارحتا الديـار وحــبورا
لاهيه بى اقــــدار وبحظوظى لاعبه الكوره


المقسومه مابتتفات وآخر العلاج الكى
طشيت بلا هداى ضارب بطون الصـــى
شايلو ليلى صياح ويبس لهاتى الغــى
هقلــــتا حد دودرتــا حظــى يابس ونى

المقسومه مابتتفات والعرجــا ترجع ساما
هماً على مطبوق واوجــاعـى زايــده الامـا
تربايــة بطـــر امــاتو الزايد سماح ووسامــه
بارحنى فارق دربــى ورّث قــماحى علامه