سليكشن

جربنا الوجع دواهو كى ولواع
وشفنا القلب زى السلـــع يتبـــاع
جربنا الخوة تمدغ قفـــاك مقــلاع
وعاشرنا الرجال سنداً يقيفو قلاع

ضوقك يارفيق قبال شربنا مرارو
وجربنا العشق يخرت القلـــب جرارو
شاكوش السجم دالق الرويس عبارو
طشينا فتنا الدار قاطعين سماع اخبارو

الزول الوسيم قاسى وصعيب مشوارو
متوهط بين الضلوع سكنو ووحايح نارو
صبرا جميل ساويهـــو عـــارش دارو
وكلو ليهو يهون وحاشاى اقل مقدارو


لزول الوسيم جامع الخصال وسماحه
فارقنى ورحل خلفلى ضيق ومناحه
سمح الصبر وقاسيه السموم نتاحه
زادى ليهو غناى انظم وازيدو ملاحه



الزول الوسيم غرز فى حشاى نشابو
حد مانقول فرج تالـــنـــا يقفـــل بـــابـــو
فرقنا الزمن بـــى وجعــة ظـــروف اتعابو
صرنا زى غراقا فى عز الدمــــيره يشابو



الزول الوسيم جامع سمح الخصال والسيره
هالكانى مرنوعة الوريد المكتمل تسطيرا
انظم فى الشعر مجانى لا رخصه لاتسعيره
وبرضى ماارضيتا السالبانى بى دلال تحويره


الزول الوسيم عرف غلاوتو واعتزا
لاهيه ولاعبه ومو داريه طرفى جافا الخزه
درة وادى الحسان سمحة لون وبراطما" لذه
هردت قلبى جابتلو الانضراب والــهـــــــزه

قدَمت بي مهل شالت قلب معشوق
خلت روح أخــــوك إتعلقت بي شوق
كل نمي وغناي ياخوي مفصِّلو فوق
منها مالقيت غـــــير الصدود وعقوق


نحـنا كـبار ونـحنا شرار ونـحنا عمار ونحنا برانا
نحنا القول ونحنا اصول ونحنا فحول ونحنا ترانا
نحنا اسود ونحنا نقود كلــمتنا توازن الجبخانه
نـحنا اولاد ربـاط قبيلة" المــولى عــظــم شانا


نحنا الكل ونحنا الضل ونحنا كلامنا الصاح
نحنا كرام ونحنا عظام ونحنا سهول وبراح
نحنا تكيه ونحنا سعيه ونحنا الزارق النتاح
نحـنا اولاد ربـاط ملـينا الـدنيا علـم وفُصاح

نحنا الفاس ونحنا الساس ونحنـا الكـون
نحنا الايد تاريخا" يملئ الدنيا علم وفنون
نحنا للعروض ساعين الدُكرى المسنون
غبش حاريَن وكت الحاره حاشانا ماكرتون

نحنا ندى نحنا الشريك ونحنا ابديس
نحنا دقش نحنا ابحمد الهواهو حديـث
نحنا امور ونحنا صدور ناعله لى ابليس
نحنا ودلبونا وكت الحاره ضربو سديس

من بحر السماحه غرف الكريم اداها
قوام موزون ابدع فيها من ســـــواها
طابقه البوخه طلت مره من مخبباها
سلبت روحى بى فدعة ميمنا التالاها