الحروف الابجدية

اعترضتك فى قوانين المدينة
و فى مجاملتك مع خلقا بتترصد قلوبن للاذية
فى مراسيم التحضر وانحلالة
و من تداخل فى المعانى و اختلاله
تترسم ثغراته واضحة و من خلاله
ينفذ الحلم البحقق للمقاصد و المفاسد
لى هوى الناس المريضه على الرذالة
و تندثر كامات تقاليدنا وتراثنا
و الحروف الابجدية
داير ابا ليكى فى شرح المعانى
او افسر ليكى مايحدث من الخلق المعانا
فى ظروف مستقبلية
من تراث الغرب شالو
لى كلام احلى و منمق
فى تسلسل
سيدو يتبع فى الطريقة السلمية
مرة يغمز عينو يشرح . . .
فى توسل
مرة ينظر فى عيونك . . .
بى تأمُل
تلقى برهات بين كلامو
ياها مصدر للاذية
تانى اقولك احذريهم
يا عيون كل الصحارى
و إمتداده
يا هدف مختوت مثبت فوق صوارى
و إعتداده
و ياحلم مرفوع شعار ناسا ابيه
لا تخلى الشمس تكتل لى ثمار حلة بلدنا
و تقطف ازهارا الندية
نبقى فى آهات تغلغل فى كيانا
و نبدا نهتك فى عروضنا
بى ستار اسمو الدراسة الجامعية
لا.........
اقولا صريحة واضحة
لا يغرك جمال مرسوم موصم بالفضيحة
لينا اصولنا بنمشى بيها
و بى دمانا بنفتديها
تبقى معلم
تبقى مرسم
تبقى منبر فى النابر العال

مية